ቫይታሚን ኤ (Vitamin A)

በተፈጥሮ መልክ ከምግብ የሚገኝ ቫይታሚን  ሰውነት ላይ ጉዳት አያደርስም። ነገር ግን  ከሚመከረው መጠን በላይ በክኒን መልኩ ሲወሰዱ አንዳንድ የቫይታሚን ኤ አይነቶች ለሰውነት ጉዳት ሊኖራቸው ይችላል።

ፕሪፎርምድ ቫይታሚን ኤ ከልክ በላይ ሲወሰድ የማዞር፣ የማቅለሽለሽ፣ እንዲሁም የራስ ምታት ስሜት እንዲሰማ ሊያደርግ ይችላል። ከዛም በላይ ኮማ ሊያስገባ ሲብስም ለሞት ሊዳርግ ይችላል። እርጉዝ የሆኑ ሴቶች ከልክ በላይ ፕሪፎርምድ ቫይታሚን ኤ ሲወስዱ በጽንሱ ላይ የአካል ጉዳት ሊያደርስ ይችላል። በዚህ ምክንያት ያለሀኪም ትእዛዝ እርጉዝ የሆኑ ሰዎች ፕሪፎርምድ ቫይታሚን ኤ እንዲወስዱ አይመከርም።

ሌሎች የቫይታሚን ኤ አይነቶች ማለትም ፕሮቫይታሚን ኤ እና ቤታ ካሮቲን በሰውነት ውስጥ ከሚገባው በላይ ሲገኝ የቆዳን ቀለም ወደ ቢጫ ወይም ብርቱካናማ ቀለም ሊለውጥ ይችላል። እርጉዝ የሆኑ ሴቶች ይህንን አይነት የቫይታሚን ኤ አይነት ሲወስዱ በጽንስም ሆነ በእናት ጤና ላይ ጉዳት አያደርስም።