አለርጂክ ሪሂኒቲስ (የሽታ አለርጂ)

አፍንጫን በጨው ውሀ ማጠብ በአለርጂክ ሪሂኒቲስ (በሽታ አለርጂ) ምክንያት ለሚፈጠር የአፍንጫ መደፈንን ለማስታገስ ይረዳል። በጨው ውሀ አፍንጫን ማጠብ ንፍጥን እና አለርጅኖችን ያስወግዳል እንዲሁም እብጠትን ስለሚቀንስ ለመተንፈስ እንዲቀል ያደርጋል።

አፍንጫን በጨው ለማጠብ የሚያስፈልጉ ነገሮች የተፈላ (ተፈልቶ የቀዘቀዘ) ወይም ከተቻለ ዲስትልድ የሆነ ውሀ ጨው እና ውሀውን መያዣ ብልቃጥ ናቸው። የቧንቧ ውሀ መጠቀም አግባብ አይደለም። ጨው ውሀው ውስጥ ከሟሟ በኋላ በአንድ አፍንጫ ቀዳዳ ውሀውን እየጨመሩ በሌላኛው እንዲወጣ በማድረግ አፍንጫን ማጠብ ይቻላል። ይህንን በቀላሉ ለማድረግ የሚረዳ ነቲ ፓት የሚባል ከፕላስቲክ የተሰራ ትንሽ ማንቆርቆርያ የሚመስል እቃ በፋርማሲ ይሸጣል። እንደአማራጭ ሲሪንጅ (መርፌ የሌለው) መጠቀም ይቻላል።

አፍንጫ ውስጥ የጨው ውሀውን ሲጨምሩ በሌላኛው አፍንጫ ቀዳዳ እንዲወጣ አንገትን ወደጎን (ወደትከሻ) ማድረግ እና ወደፊት በትንሹ ጎንበስ ማለት ያስፈልጋል። የብልቃጡ (የኔቲ ፖት ወይም የስሪንጁ) ጫፍ ከጣት አንጓ ግማሽ የበለጠ መግባት የለበትም። ውሀውን ወደአፍንጫ ሲጨምሩ በአፍንጫ መተንፈስ ለትንታ ሊያጋልጥ ስለሚችል በአፍ ብቻ መተንፈስ ያስፈልጋል። ውሀውን እየጨመሩ መናፈጥ (ወደውጭ መተንፈስ) እና በመደጋገም አፍንጫን በጨው ውሀ ማጽዳት ይቻላል።

 አፍንጫን በጨው ውሀ ከታጠቡ ብኋላ የአፍንጫ ውጩን ባዝሊን (ፔትሮልየም ጄሊ) መቀባት ጥሩ ነው። በጨው ውሀ አፍንጫን ካጠቡ በኋላ ሊያጋጥሙ የሚችሉ የጎን ጉዳቶች የአፍንጫ ማቃጠል መቆጥቆጥ እና የህመም ስሜት ናቸው። ይህ ከታየ የጨውን መጠን መቀነስ ወይም መበረዝ ያስፈልጋል።

ይህ ህክምና በተለይ ሌላ መድሀኒት መውሰድ የማይችሉ ለህጻናት እና ለእርጉዝ ሴቶች ጠቃሚ ሊሆን ይችላል። ቤት ውስጥ የጨው ውሃ ማዘጋጀት ለማይችሉ ወይም ለማይፈልጉ ሰዎች ፋርማሲ ውስጥ ለዚህ ተብለው በተለያየ ስም የሚሸጡ የአፍንጫ ማጠቢያዎች ይገኛሉ። እነዚህ ማጠቢያዎች አንዳንዴ በጨው ፋንታ ሶድየም ባይካርቦኔት (በተለምዶ ቤኪንክ ሶዳ) አላቸው። ሁለቱም ማለትም ጨውና ቤኪንክ ሶዳ ያላቸው የአፍንጫ መታጠቢያዎች አሉ። ለምሳሌ ኬትል ፖት ኔቲ ፓት (Kettle Neti Pot) ጨው እና ቤኪንግ ሶዳ ያለው ነው።